امریکہ میں پاکستانی سفیر مسعود خان نے کہا کہ پاکستان میدان جنگ نہیں بلکہ دو عالمی طاقتوں کے درمیان ملاقات کی جگہ بن سکتا ہے۔
واشنگٹن میں ایک مقامی تھنک ٹینک سے خطاب کرتے ہوئے مسعود خان نے کہا کہ پاکستان امریکہ چین تعاون کو فروغ دینے میں اہم کردار ادا کر سکتا ہے اور دونوں ممالک کو پاکستان کے مختلف شعبوں میں سرمایہ کاری کرنی چاہیے۔
انہوں نے کہا کہ وہ سٹریٹجک توازن برقرار رکھنے، فوجی سازوسامان کی بحالی اور دہشت گردی کے خلاف پاکستان کی جنگ میں مالی معاونت کے لیے امریکی فیصلوں کا انتظار کر رہے ہیں۔
انہوں نے کہا کہ امریکہ کو جنوبی ایشیا کی سلامتی پر بھی توجہ دینی چاہیے اور طالبان، داعش اور القاعدہ جیسے گروپوں کے خطرے سے نمٹنے کے لیے ایک مربوط حکمت عملی کی ضرورت ہے۔