اسلام آباد: وزیر اعظم شہباز شریف نے غزہ کی پٹی میں جنگ بندی سے متعلق سلامتی کونسل کی قرارداد کا خیر مقدم کیا ہے۔
وزیر اعظم شہباز شریف نے ایک بیان میں کہا کہ غزہ میں جنگ بندی سے متعلق سلامتی کونسل کی قرارداد خوش آئند ہے اور عالمی برادری کو غزہ سے متعلق سلامتی کونسل کی قرارداد پر عمل درآمد یقینی بنانا چاہیے۔
وزیراعظم نے کہا کہ غزہ کی پٹی میں نہتے فلسطینیوں پر جاری صہیونی ظلم و جبر کا ہمیشہ کے لیے خاتمہ ہونا چاہیے کیونکہ اسرائیل کے وحشیانہ حملوں کے نتیجے میں آج تک ہزاروں خواتین اور بچے شہید ہو چکے ہیں۔
شہباز شریف نے مزید کہا کہ غزہ کی پٹی میں ہسپتالوں اور مہاجر کیمپوں پر دانستہ بمباری کی شدید مذمت کرتے ہیں اور پاکستان جون 1967 سے پہلے کی سرحدوں کے ساتھ فلسطینی ریاست کی حمایت جاری رکھے گا۔
دریں اثنا، اقوام متحدہ میں پاکستان کے مستقل نمائندے نے غزہ سے متعلق اقوام متحدہ کی سلامتی کونسل کی قرارداد کی منظوری کا خیرمقدم کیا۔
پاکستان کے مستقل نمائندے منیر اکرم نے ایک بیان میں کہا کہ پاکستان نے اقوام متحدہ کی سلامتی کونسل کی قرارداد 2728 کی منظوری کا خیرمقدم کیا اور غزہ سے متعلق اقوام متحدہ کی سلامتی کونسل کی قرارداد پر فوری کارروائی کا مطالبہ کیا۔
سلامتی کونسل نے ایک قرارداد منظور کی جس میں غزہ میں فوری جنگ بندی کا مطالبہ کیا گیا۔
غور طلب ہے کہ اقوام متحدہ کی سلامتی کونسل نے غزہ میں فوری جنگ بندی کی قرارداد کی منظوری دی تھی۔