امریکی وزیر دفاع لائیڈ آسٹن کو کئی ہفتے قبل کینسر کی تشخیص کے بعد انتہائی نگہداشت یونٹ (آئی سی یو) میں داخل کرایا گیا تھا تاہم امریکی صدر جو بائیڈن دو ہفتے تک اپنے وزیر دفاع کی صحت کے بارے میں اندھیرے میں رہے۔
امریکی میڈیا رپورٹس کے مطابق ڈاکٹروں نے بتایا کہ امریکی وزیر دفاع کو معمول کے طبی معائنے کے دوران کینسر کی تشخیص ہوئی، امریکی وزیر دفاع کی 22 دسمبر کو سرجری ہوئی اور اگلے روز وہ گھر چلے گئے۔
ڈاکٹروں کے مطابق یکم جنوری کو لائیڈ آسٹن کو کچھ پیچیدگیوں کے باعث دوبارہ اسپتال میں داخل ہونا پڑا۔ وزیر دفاع پروسٹیٹ کینسر کی سرجری کے بعد انتہائی نگہداشت کے اسپتال میں داخل تھے۔
ڈاکٹروں کا کہنا ہے کہ لائیڈ آسٹن کا پروسٹیٹ کینسر ابتدائی مراحل میں ہے اور وہ تیزی سے صحت یاب ہو رہے ہیں۔
ادھر وائٹ ہاؤس نے انکشاف کیا ہے کہ امریکی صدر کو وزیر دفاع کے کینسر کے بارے میں دو ہفتے سے زائد عرصے تک اندھیرے میں رکھا گیا۔