امریکی فوج کی سینٹرل کمانڈ (CENTCOM) کے کمانڈر جنرل مائیکل ایرک کوریلا نے پاکستان آرمی ہیڈ کوارٹرز (جی ایچ کیو) کا دورہ کیا اور آرمی چیف جنرل عاصم منیر سے ملاقات کی۔
آئی ایس پی آر کے مطابق آرمی چیف جنرل سید عاصم منیر اور سینٹ کام کے کمانڈر جنرل مائیکل ایرک کوریلا کے درمیان ہیڈ کوارٹرز میں ہونے والی ملاقات میں باہمی دلچسپی کے امور بالخصوص علاقائی سلامتی کے امور پر تعاون پر تبادلہ خیال کیا گیا۔
آئی ایس پی آر کے مطابق ملاقات میں دونوں فریقین نے مشترکہ تربیتی طریقوں پر بھی تبادلہ خیال کیا اور سینٹ کام اور پاک فوج کے درمیان تربیت کو تیز کرنے کی ضرورت کا بھی اعادہ کیا۔
آئی ایس پی آر کے مطابق سینٹ کام کے کمانڈر جنرل کریلا نے دہشت گردی کے خلاف جنگ میں پاک فوج کی کامیابیوں کو سراہا اور خطے میں امن و استحکام کے حصول کے لیے پاکستان کی مسلسل کوششوں کی تعریف کی۔