لاہور: چیئرمین پی سی بی کی زیر صدارت پاکستان سپر لیگ (پی ایس ایل) کے نویں ایڈیشن کی تیاریوں سے متعلق اہم اجلاس میں سیکیورٹی اور مارکیٹنگ سمیت دیگر اہم امور پر تبادلہ خیال کیا گیا۔
ذرائع کے مطابق محسن نقوی کی پہلی ترجیح حکومتی ذمہ داری کے باوجود پی ایس ایل کا کامیابی سے انعقاد ہے۔
ذرائع کا کہنا ہے کہ پی ایس ایل کے حوالے سے میٹنگ میں پی سی بی کے سی ای او سلمان ناصر، ڈائریکٹر انٹرنیشنل کرکٹ عثمان واہل اور پی ایس ایل انتظامیہ کے علاوہ مارکیٹنگ ڈیپارٹمنٹ کے حکام بھی موجود تھے۔
اجلاس میں آئی جی پنجاب سمیت اعلیٰ سیکیورٹی اداروں کے افسران بھی موجود تھے۔
پی ایس ایل حکام نے چیئرمین پی سی بی کو پی ایس ایل 9 کے اخراجات سے آگاہ کیا جس کے بعد چیئرمین پی سی بی نے پی ایس ایل کے اخراجات کی تفصیلات دریافت کیں۔
پی سی بی حکام نے چیئرمین پی سی بی کو پی ایس ایل کی افتتاحی تقریب اور ایوارڈ تقریب کے بارے میں آگاہ کیا۔
اجلاس کے دوران چیئرمین پی سی بی نے پی ایس ایل کے لیے حفاظتی اقدامات کو یقینی بنانے کی ہدایت کی۔
پی سی بی کے چیئرمین محسن نقوی نے بھی پی ایس ایل کے لیے بڑے پیمانے پر تشہیری مہم چلانے کا حکم دیا۔