آئرلینڈ کے دارالحکومت ڈبلن میں چاقو زنی کی 2 وارداتوں کے بعد ہنگامے پھوٹ پڑے، مشتعل افراد نے ٹرام، بس اور کئی گاڑیوں کو آگ لگا دی جبکہ دکانیں لوٹ لی گئیں۔
ڈبلن کے سٹی سینٹر میں چاقو کے حملے سے 5 برس کی بچی اور ایک خاتون سمیت 5 افراد کو زخمی کردیا گیا تھا جبکہ ڈبلن ہی میں اسکول کے باہر ایک اور واردات میں 6 برس کی بچی اور 5 برس کے بچے کو چاقو مار کر زخمی کیاگیا تھا۔
پولیس کے مطابق چاقو زنی کے حملوں کے بعد مشتعل افراد کی جانب سے ہنگامہ آرائی کی گئی جس پر پولیس نے لاٹھی چارج کیا۔
پولیس کی جانب سے حملوں میں مبینہ طور پر ایک ہی شخص کو ملوث قرار دیا گیا ہے جو زخمی حالت میں اسپتال میں داخل ہے، حملے میں مبینہ طور پر ملوث ملزم گزشتہ 20 سال سے آئرلینڈ ہی میں مقیم تھا۔
پولیس کا کہنا تھا کہ فسادات کا دہشتگردی سے کوئی تعلق نہیں ہے، امن امان کی صورتحال کے پیش نظر علاقے کو گھیرے میں لے لیا ہے جبکہ سکیورٹی وجوہات کی بنا پر ٹرینٹی کالج کو بند کر دیا گیا ہے۔
