وزیرِاعظم کا دورہ گلگت بلتستان: سیلاب متاثرین کی دلجوئی اور امداد کا اعلان
پس منظر: شدید بارشیں، سیلاب اور تباہ کاریاں
گلگت بلتستان حالیہ دنوں میں شدید بارشوں اور لینڈ سلائیڈنگ کی لپیٹ میں رہا، جس کے باعث کئی علاقوں میں انفراسٹرکچر کو نقصان پہنچا، مکانات منہدم ہوئے اور مقامی آبادی شدید متاثر ہوئی۔ قدرتی آفات کے ان سانحات میں قیمتی جانوں کا ضیاع بھی ہوا، جس نے علاقے کے باسیوں کو بے یار و مددگار کر دیا۔
وزیراعظم کا ہنگامی دورہ اور پرتپاک استقبال
ایسی سنگین صورتحال میں وزیراعظم پاکستان میاں محمد شہباز شریف نے ایک روزہ دورہ کرتے ہوئے گلگت بلتستان کا رخ کیا۔ گلگت ایئرپورٹ پر ان کا استقبال گورنر سید مہدی شاہ، وزیر اعلیٰ گلبر خان، چیف سیکرٹری، آئی جی پولیس، فورس کمانڈر اور دیگر اعلیٰ حکام نے کیا۔
وفد میں وفاقی کابینہ کے اہم اراکین بھی شامل تھے، جن میں وزیر مواصلات عبدالعلیم خان، وزیر اطلاعات عطاء اللہ تارڑ، وزیر برائے گلگت بلتستان و کشمیر انجینئر امیر مقام، وزیر موسمیاتی تبدیلی ڈاکٹر مصدق ملک، مشیر داخلہ رانا ثناء اللہ اور کوارڈینیٹر شبیر عثمانی شامل تھے۔
گورنر سے ملاقات اور سیلاب پر بریفنگ
وزیراعظم نے گورنر گلگت بلتستان سید مہدی شاہ سے خصوصی ملاقات کی جس میں حالیہ بارشوں سے پیدا ہونے والی تباہی، جاری ترقیاتی منصوبے اور امن و امان کی مجموعی صورتحال پر بریفنگ دی گئی۔ ملاقات کے دوران سیلاب میں جاں بحق افراد کے لیے دعا بھی کی گئی۔
متاثرین سے ملاقات، مشکلات سنیں اور مالی امداد دی
وزیراعظم شہباز شریف نے سیلاب متاثرہ علاقوں کا دورہ کیا اور متاثرین سے ملاقات کے دوران ان کے مسائل سنے۔ انہوں نے موقع پر امدادی رقوم بھی تقسیم کیں اور ہر ممکن تعاون کی یقین دہانی کرائی۔ متاثرین نے وزیراعظم سے مطالبہ کیا کہ وفاقی حکومت فوری ریلیف فراہم کرے تاکہ ان کی مشکلات کم ہوں۔
20 ارب روپے سے زائد نقصان: حکومتی ترجمان کی تفصیلات
حکومت گلگت بلتستان کے ترجمان فیض اللہ فراق کے مطابق حالیہ سیلاب سے خطے کو 20 ارب روپے سے زائد کا مالی نقصان پہنچا ہے۔ انہوں نے کہا کہ وفاقی حکومت کا تعاون علاقے کے لیے آکسیجن جیسا ہے اور عوام وزیراعظم کی آمد کو ایک امید کی کرن سمجھتے ہیں۔
ان کا کہنا تھا کہ اجڑے ہوئے گھر، خالی بستیاں اور بے سہارا لوگ وفاق سے مدد کے منتظر ہیں۔ وزیراعظم کا یہ دورہ زخموں پر مرہم رکھنے کے مترادف ہے اور عوامی سطح پر اس کی بھرپور پذیرائی کی جا رہی ہے۔