کراچی: اسٹیٹ بینک کے گورنر جمیل احمد نے کہا ہے کہ عالمی اتار چڑھاؤ کے باوجود پاکستان کی معیشت بحالی کی راہ پر گامزن ہے اور آج مہنگائی تیزی سے کم ہورہی ہے۔
کراچی کے مقامی ہوٹل میں آئی سی ایم اے پاکستان کے کانووکیشن میں مہمان خصوصی کی حیثیت سے خطاب کرتے ہوئے اسٹیٹ بینک کے گورنر نے کہا کہ پاکستان کے کرنٹ اکاؤنٹ خسارے میں نمایاں کمی آئی ہے جس کے نتیجے میں پاکستانی شرح مبادلہ مستحکم ہے۔
انہوں نے کہا کہ حکومت اور اسٹیٹ بینک کے میکرو اکنامک چیلنجز پر قابو پانے کے پختہ عزم کی وجہ سے معیشت میں نمایاں بہتری آئی ہے۔ ماحول سے ہٹ کر ہمیں اس بات کا جائزہ لینے کی ضرورت ہے کہ ہماری معیشت کہاں ہے اور کس سمت جا رہی ہے۔
اسٹیٹ بینک کے گورنر نے کہا کہ عالمی اتار چڑھاؤ کے باوجود پاکستان کی معیشت بحالی کی راہ پر گامزن ہے اور آج مہنگائی تیزی سے کم ہو رہی ہے۔
جمیل احمد نے مزید کہا کہ ایک سال قبل پاکستان کو انتہائی مشکل معاشی صورتحال کا سامنا تھا جب افراط زر 38 فیصد تک پہنچ گیا تھا اور زرمبادلہ کے ذخائر تیزی سے کم ہو رہے تھے۔