پاکستان پیپلز پارٹی کی سینیئر رہنما شیری رحمان نے پی آئی اے کی نجکاری کے حکومتی فیصلے کو مسترد کر دیا ہے۔
جیو نیوز کے پروگرام نیا پاکستان میں بات چیت کرتے ہوئے انہوں نے کہا کہ پی آئی اے کو پبلک پرائیویٹ پارٹنرشپ کے تحت ٹھیک کیا جا سکتا ہے، پبلک پرائیویٹ پارٹنرشپ سے یہ ادارہ منافع بخش ہو سکتا ہے۔
اس سے قبل وفاقی وزیر خزانہ محمد اورنگزیب نے اداروں کی نجکاری کو لازمی قرار دیتے ہوئے کہا تھا کہ ہمارا ایجنڈا صرف عملدرآمد اور نفاذ کا ہے ، حکومت کا کام بزنس چلانا نہیں بلکہ پالیسیاں بنانا ہے اور اگر ارادے پختہ ہوں تو سب کچھ ممکن ہے۔
لاہور میں الیکشن کمیشن کے دفتر میں میڈیا سے گفتگو کرتے ہوئے انہوں نے کہا کہ اس ادارے کی نجکاری ضرور کی جائے گی اور اس میں پی آئی اے سب سے آگے ہے اور نجی شعبے کو اس ادارے کا انتظام سنبھالنا چاہیے۔
بعد ازاں وفاقی وزیر اطلاعات عطاء تارہ نے کہا کہ حکومت مئی میں پی آئی اے کی نجکاری کا ٹینڈر مکمل کرنے کے لیے کام کر رہی ہے اور ایئرپورٹ کی منتقلی بھی مکمل کر لی جائے گی۔
جیو نیوز کے جرگہ کی نشریات میں گفتگو کرتے ہوئے انہوں نے کہا کہ پیپلز پارٹی ملک کی بھلائی کے لیے مشکل وقت میں ہمارا ساتھ دے گی۔
انہوں نے کہا کہ صدر آصف زرداری بطور صدر وفاق اور حکومت کو مضبوط کریں گے۔