واشنگٹن(آئی این پی) پاکستان میں امیدوارالیکشن کے لیے کاغذات نامزدگی جمع کرارہے ہیں ،ایسے میں امریکہ کے دورے پر موجود پاک فوج کے سربراہ جنرل عاصم منیر کا موقف بھی آگیا اورانہوں نے واضح کیا کہ ملک میں عام انتخابات مارچ سے پہلے ہوں گے۔
نجی ٹی وی چینل کے مطابق جنرل عاصم منیر نے واشنگٹن میں پاکستانی سفارتخانے میں پاکستانی نژاد امریکی کمیونٹی کی تقریب میں شرکت کی ، بعدازاں اس تقریب میں موجود پاکستانی نژاد امریکی کاروباری شخصیت طاہر جاوید نے امریکی نشریاتی ادارے سے گفتگو میں کہا کہ آرمی چیف جنرل عاصم منیر نے کہاہے کہ لاجسٹکس کی وجہ سے انتخابات کچھ دن آگے پیچھے ہوسکتے ہیں لیکن الیکشن رکیں گے نہیں اور ہرصورت مارچ میں سینٹ کے انتخابات سے پہلے عام انتخابات ہوں گے۔
تقریب کے دوران آرمی چیف نے پاکستانی نژاد امریکیوں سے معیشت ، دہشتگردی، انفارمیشن ٹیکنالوجی اور زراعت سمیت مختلف امور پر تبادلہ خیال کیا اورپاکستانی کمیونٹی کی خدمات کو سراہا۔