غزہ میں فلسطینیوں کے قتل عام سے دلبرداشتہ شخص نے پیرس میں چاقو اور ہتھوڑی سے حملہ کرکے جرمن سیاح کو ہلاک اور برطانوی شہری سمیت دو افراد کو شدید زخمی کر دیا۔
غیر ملکی خبر ایجنسی کے مطابق پیرس میں چاقو اور ہتھوڑی سے حملہ کرنے والے ملزم کی تاریخ پیدائش 1997 ہے جسے گرفتارکر لیا گیا ہے، حملہ آور کا نام مقامی میڈیا نے ارمند آر بتایا ہے۔
فرانسیسی وزارت داخلہ کے مطابق ملزم کو ایک اور حملے کی منصوبہ بندی کرنے پر 2016 میں پہلے ہی چار سال قید کی سزا ہو چکی ہے، ملزم انتہاپسند تھا، اس کی مسلسل نگرانی کی جانی چاہیے تھی۔
فرانس کے وزیر داخلہ نے کہا کہ ملزم نفسیاتی مریض تھا،غزہ جنگ میں فلسطینیوں کی موت پر دلبرداشتہ تھا۔
اس حوالے سے فرانسیسی وزیراعظم کا کہنا ہے کہ فرانس دہشتگردوں کے آگے ہتھیار نہیں ڈالے گا جبکہ میڈیا رپورٹس میں بتایا گیا ہے کہ انسداد دہشت گردی پراسیکیوٹرز حملے کی تحقیقات کریں گے۔
