پی ڈی ایم اے نے خیبرپختونخوا میں حالیہ بارشوں سے ہونے والے جانی و مالی نقصان کی رپورٹ جاری کردی۔
پی ڈی ایم اے کی رپورٹ کے مطابق خیبرپختونخوا میں گزشتہ 48 گھنٹوں کے دوران مسلسل بارشوں اور لینڈ سلائیڈنگ سے ہونے والے حادثات میں پشاور، مردان، مالاکنڈ، باجوڑ، سوات اور لوئر دیر سمیت مختلف اضلاع میں 27 افراد جاں بحق اور 38 زخمی ہوئے۔ .
پی ڈی ایم اے کی رپورٹ کے مطابق 129 مکانات کو جزوی اور 33 مکانات کو مکمل نقصان پہنچا۔
اس حوالے سے وزیراعلیٰ خیبرپختونخوا علی امین خان گنڈا پور نے بھی نوٹس لے لیا ہے اور ان کی ہدایت پر متاثرین میں امدادی سامان تقسیم کیا جائے گا۔
اس کے علاوہ، خیبرپختونخوا کے سربراہ نے جاں بحق اور زخمیوں کے لواحقین کو فوری امدادی چیک فراہم کرنے اور بند سڑکوں کو جلد کھولنے کے لیے ضروری اقدامات کرنے کا حکم دیا۔
وزیراعلیٰ نے تمام متعلقہ حکام، پی ڈی ایم اے، مقامی انتظامیہ اور ایمرجنسی سروسز 1122 کو ہائی الرٹ رہنے کی ہدایت کی۔
پی ڈی ایم اے کے ڈائریکٹر جنرل محمد قیصر خان نے کہا کہ متاثرہ علاقوں میں امدادی کارروائیاں جاری ہیں اور شدید برف باری کے باعث مالم جبہ میں پھنسے چھ سیاحوں کو بچا لیا گیا ہے اور پی ڈی ایم اے تمام اضلاع سے قریبی رابطے میں ہے۔