اسلام آباد: ملک بھر میں عام انتخابات 2024 کے لیے انتخابی مہم دوپہر 12 بجے ختم ہوگئی۔
ایکسپریس نیوز کے مطابق انتخابات میں حصہ لینے والے تمام امیدواروں اور جماعتوں کو 6 فروری کی نصف شب تک انتخابی مہم روکنے کا حکم دیا گیا تھا جس کے بعد جلسہ جلوسوں پر پابندی عائد کردی گئی۔
لاہور کے علاقے یوحنا آباد میں مسلم لیگ ن کا آخری انتخابی جلسہ ہوا جس میں لوگوں کی بڑی تعداد نے شرکت کی اور لاڑکانہ میں آخری انتخابی جلسے سے پیپلز پارٹی کے چیئرمین بلاول بھٹو زرداری نے خطاب کیا۔
جمعیت علمائے اسلام کے سربراہ مولانا فضل الرحمان نے ڈیرہ اسماعیل خان میں انتخابی مہم کے آخری جلسے سے خطاب کیا جب کہ جماعت اسلامی کے امیر سراج الحق نے خیبرپختونخوا میں ریلی کی قیادت کی۔
ایم کیو ایم کی انتخابی مہم کا آخری جلسہ ضلع وسطی میں فائیو اسٹار چورنگی پر ہوا جس میں کارکنوں کی بڑی تعداد نے شرکت کی۔ مصطفیٰ کمال اور خالد مقبول نے شرکاء سے خطاب کیا۔
کراچی میں حافظ نعیم الرحمان نے گزشتہ روز مختلف علاقوں میں ریلیوں اور جلسوں سے خطاب کیا، جس کا اختتام رات گلستان جوہر کے پرفیوم چوک پر شاندار آتش بازی کے ساتھ ہوا۔
الیکشن کمیشن کے ایک اہلکار کے مطابق مقررہ مدت کے بعد انتخابی مہم، اشتہارات اور دیگر تحریری مواد کی الیکٹرانک اور پرنٹ میڈیا پر اشاعت ممنوع ہے جس میں کسی مخصوص سیاسی جماعت یا امیدوار کی حمایت یا مخالفت کا شبہ ہو۔
الیکشن کمیشن کے مطابق انتخابی عمل سے قبل ہر قسم کے میڈیا پولز پر پابندی عائد کر دی جائے گی۔ میڈیا انتخابات کے اختتام کے ایک گھنٹہ بعد نتائج کی رپورٹنگ شروع کر سکتا ہے، جو واضح طور پر اس بات کی نشاندہی کرتا ہے کہ نتائج ابتدائی اور غیر سرکاری ہیں۔
الیکشن کمیشن کے مطابق الیکٹرانک اور پرنٹ میڈیا ضابطہ اخلاق پر سختی سے عمل کرے گا اور خلاف ورزی کی صورت میں پیمرا اور پی ٹی اے کو قانونی کارروائی کرنے کی ہدایت کی گئی ہے۔