ٹوکیو: جاپانی ایئرلائن کے نظام پر سائبر حملے سے کئی ملکی اور بین الاقوامی پروازیں متاثر ہوئی ہیں۔
غیر ملکی میڈیا رپورٹس کے مطابق جاپان ایئرلائن کی جانب سے جاری بیان میں کہا گیا ہے کہ کمپنی کے سسٹمز پر سائبر حملے سے اندرونی اور بیرونی نظام متاثر ہوا۔
جاپان ایئر لائنز نے جمعرات کو ایک بیان میں کہا کہ سائبر حملے کی وجہ سے 20 سے زائد اندرون ملک پروازیں تاخیر کا شکار ہوئیں، لیکن ایئر لائن نے فوری طور پر حملے کو بے اثر کر دیا اور چند گھنٹوں میں کامیابی سے اپنے نظام کو بحال کیا۔
– ایڈورٹائزنگ –
ایئر لائن نے کہا کہ حملے سے پرواز کی حفاظت پر کوئی اثر نہیں پڑا۔ حملہ جمعرات کی صبح اس وقت شروع ہوا جب کمپنی کے اندرونی اور بیرونی نظام کو جوڑنے والا نیٹ ورک فیل ہو گیا۔
جاپان ایئر لائنز نے یہ بھی انکشاف کیا کہ اس حملے کی وجہ ایک سائبر حملہ تھا جس کا مقصد ایئر لائن کے نیٹ ورک کو تباہ کرنا اور بڑی مقدار میں ڈیٹا منتقل کرنا تھا۔
ایئر لائن کے مطابق سائبر حملے کے نتیجے میں 24 اندرون ملک پروازیں 30 منٹ سے زیادہ تاخیر کا شکار ہوئیں، حالانکہ اس میں کوئی وائرس شامل نہیں تھا اور نہ ہی کسی صارف کی معلومات لیک ہوئی تھیں۔
واضح رہے کہ آج کی جدید دنیا میں سائبر حملے بڑے پیمانے پر ہوتے ہیں اور ہیکرز بین الاقوامی طاقتوں کے زیر اثر سائبر حملے کرتے ہیں، اسی لیے حال ہی میں امریکا اور برطانیہ سمیت مختلف ممالک کو سائبر حملوں کا نشانہ بنایا گیا ہے۔